Ua lipotia mai nei le fano ai o le ola o se tagata i le faalavelave mata’utia, na alia’e mai i le aoauli o le Aso Lulu, ina ua feto’ai ni taavale se lua i le maga o Willoughby Street ma Mill Street.
Na valaau ane leoleo mo se fesoasoani, ina ua lipotia atu le lavevea ai o se taavale ma se pasika i lona ituaiga o le dirtbike, pe tusa lea o le 25 minute e te’a ai le itula e 3.
Faamauina, na avatu faatopetope lē na faafoea le pasika i le falema’i ona o le mata’utia o manu’aga na aafia ai o ia, ma ona o le tugā tele o ia manu’aga na maliu lava o ia i le falema’i.
Na avatu foi i le falema’i ni tagata se to’alua o ē na iai i totonu o le taavale lea na feto’ai ma le pasika.
Ua faamaonia le tapunia ai o ia itu auala, a o faatautaia ai su’esu’ega a le vaega e nafa ma faalavelave e tula’i mai i luga o auala tele.
Faamanino mai e leoleo o loo faatautaia pea su’esu’ega e tusa ai ma le mafua’aga o le tula’i mai o le lavea.
Puna o Faamatalaga: Waikato Police
