Ua sa’afi lē sa avea ma Minisita o Puipuiga o Niu Sila ia Ron Mark, se alii Niu Sila, na maliu i totonu o Ukraine, ona o nitu ma ni aga na faatino e lea alii e taumafai e lavea’i se isi alii fitafita. 

O lē ua maliu, o Shan-Le Kearns, 26 tausaga mai Kalaiesitete.

Māua i lipoti mai le NZ Herald, o Shan ua 2 tausaga o nofo i Ukraine i le faatino ai o lana konekarate e fesoasoani ai i fitafita Niu Sila.

Ta’ua e Ron Mark, ua faaalia i gaioiga a Shan lona ituaiga tagata, i lona loto alofa i lona faamuamua ai o le saogalemu o lona uso a tagata, nai lo o ia.

I lipoti na faamauina na maliu Shan i se osofa’iga e faaaogā ai auala faatekonolosi, poo le vaega ua ta’ua o le drone strike a o ia taumafai e faasaoina ma lavea’i mai le isi fitafita o loo manu’a.

O Shan e lē o se tagata sa auai i ni a’oa’oga tau militeri, ae ua faaalia e lea alii le loto toa ma le agaga fesoasoani i lona tali atu mo ē na manunu’a a o vātau ai fitafita i Ukraine.

Māua foi i lipoti, na maliliu faatasi lea alii Niu Sila ma se alii fitafita mai Finland.

O le lona 4 ai lea o tagata Niu Sila ua maliliu i totonu o Ukraine, e aofia ai le Dominic Abelen, 28 tausaga, Andrew Bagshaw, 47 tausaga, Kane Te Tai, 38 tausaga.

Puna o Faamatalaga: https://www.rnz.co.nz/news/world/562591/new-zealander-killed-in-ukraine-died-trying-to-save-fellow-soldiers-rnz-understands