Maliu se alii Kiwi Samoa i Sini Ausetalia, a o iai i galuega

Ua molimauina le salalau ai i luga o upega tafa’ilagi o sa’afi’afiga mo le alii Samoa o se tagatānuu Niu Sila ia Paul Mau’u i le oo mai o tala i le maliu ai o lea alii i totonu o Sini i Ausetalia. 

I lipoti mai le 7News na ta’ua ai e to’alua i la’ua na aafia i ni manu’aga tugā a o galulue ai i Pennant Hills Rd i le taeao o le Aso Lua o lenei vaiaso. 

Ta’ua i lipoti, na avatu Paulo i le faama’i i Westmead Hospital, ma ona o le matuiā tele o aafiaga o Paulo na maliu ai lava o ia i le falema’i, ae mo le alii o Aymen Alahmad o lē o loo aafia foi na avatu i le falemai i Royal North Shore Hospital ma o loo iai pea i tulaga tigaina. 

E māua i lipoti, na aafia i la’ua nei i se tasi o meafaigaluega e faaaogā mo simā ua ta’ua o le concrete pumping equipment. 

Ma i le tula’i mai ai o lenei faalavelave, ua iloga ona salalau ai i luga o upega tafa’ilagi sa’afi’afiga mo Paulo Mau’u aemaise o faamaisega mo le aiga. 

Faaalia i tusitusiga a sui o le aiga o Paulo, e faapea o lenei alii o se tasi o faamanuiaga i o latou aiga ma o sē e alofagia e soo se tasi.

O se tagata alofa ma o se tagata e faafiafia, ma o le ala foi lea ua misi alofa iai le to’atele. 

Ma i le tuu mai ai o tusitusiga a sui o le aiga o Paulo, o lea na faaalia ai foi manatu ma fesiligia ai e le aiga tulga o le faamaoni ma le moni o le kamupani i le faalavelave ua alia’e ma ua motusia faafuase’i ai le latou mafutaga ma si o latou atalii.

Ua faaalia e le aiga le tatau ai ona tali le kamupani ma faamatala tonu tulaga o le faalavelave, ona o le maitau sa lē tatau ona tula’i lea faalavelave. 

Ta’ua i lipoti a le 7News na faaalia e le kamupani o le Meriton lo latou faanoanoa tele i le faalavelave, ma faamanino mai ai le ave o le latou faamamafa i le saogalemu o tagata faigaluega ma o loo latou galulue vavalalata ma le SafeWork NSW. 

Ua tuuina atu i le SafeWork NSW ma leoleo i le faaitu o Sini lea matāupu mo su’esu’ega. 

A o faasolo ai la su’esu’ega o lea ua māua le tuufaatasia ai o se GoFundMe page mo le isi tagata faigaluega ia Aymen Alamad.

Ma e faamauina talu ona amata lenei itulau ua lata i le $20,000 tupe Ausetalia ua mafai ona aoina.

Puna o Faamatalaga: https://www.nzherald.co.nz/nz/kiwi-paulo-mauu-dies-in-sydney-worksite-accident-family-demands-accountability/26W3YUKY3ZAHRHEANW6PCGYNH4/?utm_medium=Social&utm_campaign=nzh_fb&utm_source=Facebook&fbclid=IwY2xjawMAnahleHRuA2FlbQIxMABicmlkETFPZm9HSkJrdHlsWUQ3UkExAR5-W1VaoBsYZtqOW2DdCl2p4fRd2RchjrVx8-QCMb3roEDhjHmnOkAZGj_E2g_aem_wwSKoxxFbDida7mdF4Uiew#Echobox=175450749