Ua faamaonia mai e leoleo le faatautaia ai o se latou su’esu’ega i se matāupu na alia’e mai i Manurewa i se taimi o le vaveao o le asō.
E tusa ai ma lipoti mai leoleo, pe tusa o le itula e 1 i le vaveao na aga’i mai ai se taavale leoleo i le mae’a ai ona aga’i atu i se isi matāupu ae vaaia loa se taavale o le ituaiga o le Mitsubishi o loo aga’i mai Sharland Road ma se taavale i lona ituaiga o le Isuzu.
Faailoa e malu o le malo, o le latou maitau atu, e foliga mai o loo tuliloa e le taavale Isuzu le taavale Mitsubishi, ma nalatou ki atu iai faailoilo o taavale leoleo i le taavale Isuzu ma le faamoemoe e tu, peita’i e le’i usita’ia le faailo a leoleo ma aga’i pea.
Ta’ua e malu o le malo e le’i umi lava ona o latou tuliloa atu taavale nei ae so’a loa e le Isuzu le taavale Mitsubishi.
E faapea, ina ua so’a le taavale Mitsubishi na vaaia le tifa i tua o le taavale mai le auala ma feto’ai ai loa ma se laau.
Na faanatinati ona taumafai atu malu malo e tali atu ma fesoasoani i tagata na i totonu o le taavale Mitsubishi peita’i, na taumafai atu mo le pasese, ae pagā lea, na maliu lava le pasese i le nofoaga na tupu ai lea falavelave.
Mo le ‘ave taavale e ta’ua, na avatu o ia i le falema’i mo togafitiga, ma o loo i se tulaga tigāina.
Ae mo le ‘avetaavale o le Isuzu e faamauina na taofia ma saisai o ia i lea lava nofoaga ae na avatu foi o ia e togafitia manu’aga, ma e ta’ua e manu’a mitimiti.
Māua, ua ma’ea iloiloga a le vaega e ta’ua o le Serious Crash Unit a le Matāgaluega o Leoleo talu ona tula’i mai lea faalavelave.
Ma ua faailoa le faatino o nisi o su’esu’ega e tau sa’ilia ni faamatalaga e tusa ai ma le mafua’aga o le alia’e mai o leneimatāupu.
Faamanino foi e leoleo lo latou galulue e tuu atu le tau’au fesoasoani i nai aiga ua aafia i lenei faalavelave mata’utia.
Ma ua tuu mai ai ma sa latou talosaga i le mamalu lautele mo se fesoasoani e ala i ni faamatalaga, poo se tasi e silafia ma iloa se vaega o lenei matāupu, e faafesoota’i atu le latou ofisa i le numera 105 poo luga o upega tafa’ilagi.
Puna o Faamatalaga: Counties Manukau Police
