O le vaveao analeia na tula’i mai ai se faalavelave i le faaitu o Waikato ina ua oo ane se valaau i leoleo o se pisinisi i se tuatusi i Waitomo e masalomia o se na osofa’iga e ni gaoi.
O le faalavelave lea ua ta’ua ua maliu ai le tamā ia Tom Phillips, lea ua toetoe atoa le fā tausaga o fesolasolata’i mai leoleo ma feavea’i solo ai lana fanau.
Ta’ua i lea lipoti na oo ane i leoleo, e to’alua ni tagata na o atu i se uila nofoalua o loo fusi ni molīuila i o la muāulu.
Na maitauina le alu atu o le la uila i Waipuna Rd, o lea na aga’i ai loa leoleo ma faatutū a latou spikes poo fola maamaa’i i luga o le auala e taumafai e poloka ai lenei uila.
Na maua e leoleo ma amata ai loa feteena’iga i tauga fana; na lavea ma faamanu’alia ai se tasi o leoleo lea o loo tigāina i le falema’i, ae na fana ai foi e leoleo le alii o Tom Phillips ma maliu ai.
O lenei faalavelave na tupu lava i le vaipanoa lea sa aga’i pea iai sa’iliga a leoleo mo lenei tamā mai Marokopa o Tom Phillips ma lana fanau.
O le taeao lava la analeila, na talanoa mai ai le komesina o leoleo, Richard Chambers ma faamautinoa mai ai, ua maliu le tagata na masalomia i le gaoiga; sa taumafai le fesoasoani muamua e faia iai ina ua lavea peita’i e le’i manuia.
E le’i fia faia se faamatalaga a le tamā o Tom Phillips ina ua fesiligia e le RNZ i le mea na tupu, ma na ta’ua e le tuafafine o lenei alii i le RNZ, e lē o fia talanoa lo latou aiga i lenei taimi, ae na ia faamautinoa mai sa aafia lona tuagane i le gaoiga lea na lipotia, ma sa faailoa atu lava i lo latou aiga le mea na tupu.
Na maua foi se faamatalaga mai le to’alua o lenei alii ma ta’ua ai e le fafine, e lē o mautonu lava lagona i lenei mea ua tupu.
E ui ua lagona le mapusaga ina ua faamutaina lenei matāupu ua leva ona tulituliloa e leoleo a o solasola ai lenei tamā ma feavea’i solo lana fanau, ae o se lagona faanoanoa foi ona o le tulaga na i’u iai.
Sa iai lava le faamoemoe o le latou aiga e mafai ona toe foi saogalemu mai le fanau i le aiga ma leai se tasi e afaina ai se ola, ae pagā lea ua ese le i’uga ua tula’i mai.
O le tausaga e 2021 na amata solasola ai Tom Phillips mai leoleo ma ave lana fanau e to’atolu, o Jayda, Maverick ma Ember.
E tupu le faalavelave analeila ma maliu ai Tom ae ave ai e leoleo lona atalii o Jayda lea e talitonu o le isi tagata lea sa la to’alua, ae ta’ua e leoleo, o loo aga’i nei sa’iliga i isi tamaiti e to’alua.
Puna o Faamatalaga: https://www.rnz.co.nz/news/national/572405/live-marokopa-dad-tom-phillips-killed-in-shootout-with-police
