Ua lata nei i le tolu tausaga o se faalavelave mata’utia na tula’i mai i faaitu o Kaikoura, a o lea faato’ā maua mai le atoaga o se iloiloga mai le Pule o Maliu i le mafua’aga na maliliu ai tagata e to’alima.
Mo le silafia o lea faalavelave, e faamauina sa alu se maimoaga a nisi o tagata e to’a sefulu ma le tasi (11).
O le mea na tupu, ua aafia le vaa ina ua taia i se tafolā, na faaleagaina lea vaa ma i’u ai lava ina goto.
O le to’aono o i latou na mafai ona sao ese mai le vaa ma aau aga’i ese mai le mea na goto ai le vaa, ae o le to’alima na lē mafai ona o ese, talitonu sa leai se auala e faasaoina mai ai i latou.
Talu ai le aafia o le vaa na liki ai ma le penisini o inā na tula’i mai ai loa ma le mala ina ua sasao le kasa oona ma mānavaina e i latou na aafia.
Ua faamanino mai e le pule o maliu poo le coroner e le’i faapea na malelemo ē na maliliu, peita’i na maliliu ona o le kasa oona o le penisini na latou mānavaina.
Faaalia foi e le komisi o su’esu’ega a le Transport Accident, na iai se faaletonu i le pamu penisini o le vaa, ma faailo foi o latou atugaluga e tusa ai ma le faatuai ona tali atu o fesoasoani muamua ona o se faaletonu na maua i auala o fesoota’iga poo le 111-dispatch system.
Ae ui i ni faaletonu na faaalia i su’esu’ega ma iloiloga e lē o iai se isi poo se ofisa o molia i lenei matāupu.
O ē na maliliu i le faalavelave, o Catherine Margaret Haddock 65 tausaga le matua, Susan Jane Cade 63 tausaga le matua mai Lower Hutt, Diana Ruby Stewart 68 tausaga le matua, Peter Charles Hockley 76 tausaga le matua, ma Maureen Pierre 75 tausaga le matua mai Kalaiesitete.
Puna o Faamatalaga: https://www.rnz.co.nz/news/national/562989/fatal-kaikoura-boat-capsizing-petrol-fumes-killed-five-passengers-coroner
