Ua iai se maliega i le va o le malo o Niu Sila ma Samoa e taoto pea le manuao o le Manawanui i se vaega o ogasami i Saute o le motu o Upolu lea na goto uga ai.
O se taunuuga lea o feutana’iga ma talanoaga i le va o sui o malo e lua i le savalia ai nei o le iva masina talu ona tupu le faaletonu i le manuao a o faia sana galuega su’esu’e i ogasami o Samoa i le masina o Oketopa o le tausaga ua mavae.
Ua faailoa lea tulaga e le tama’ita’i Palemia o le malo tausi le afioga Fiame Naomi Mataafa, a o faagasolo ai pea isi talanoaga ma feutana’iga o loo silasila ai i se aofa’iga o se tupe e totogi mo isi galuega faaauau o le puipuia o le si’osi’omaga o ogasami o nuu ma itumalo o loo latalata i le vaega o taoto ai le manuao.
O le fono lava a le Palemia o le malo tausi ma le ‘autusitala i le Aso Lulu o le vaiaso nei, na fesiligia ai i sona finagalo i le finau ai o le ta’ita’i o le vaega faaupufai e puipuia aiā tatau a tagata, o le vaa la’upasese ma uta fou lea ua faatau e le malo mo malaga i le va o Upolu ma Savaii e lē saogalemu.
Le afioga i le Palemia o le malo tausi afioga Fiame Naomi Mataafa i le feiloa’iga ma tusitala i le Aso Lulu o le vaiaso nei.
