Ua taunuu i Samoa nisi o aumalaga o tagata mai fafo e latou te molimauina le faagasologa o le faigāpalota tele poo election observers.
O nisi o loo malaga mai le ofisa o malo o le Pasefika, ae o nisi o sui o ofisa o Malo Aufaatasi e faamautū i Samoa faapea sui mai le malo o Ausetalia ma Niu Sila.
O faigā palota tetele a nisi o atunuu o le Pasefika sa malaga ai foi nisi o ofisa sinia o le tatou malo e faia lea tiute o le molimauina o le faagasologa o palota a ia atunuu.
O le a afea e i latou o molimauina ma mata’itū le faagasologa o le faigāpalota a le atunuu nisi o nofoaga e pei o falepalota.
O le aumalaga o tagata e molimauina le faagasologa o le tatou faigāpalota mai le ofisa o malo o le Pasefika i Fiti o loo ta’ita’i mai e le Komesina ma le sui o le Komisi o faigāpalota a lea atunuu o Nemani Mati, ae lagolago iai lē na te vaaia faigāpalota a le atunuu o Tonga poo se supervisor of election o Pita Vuki.
Ua faailoa e le failautusi o le ofisa o malo o le Pasefika, o le tāua o lea galuega ia tausisia e malo uma o le Pasefika ta’iala o pulegamalo faatemokarasi i taimi o faigāpalota e sa’ilia ai ta’ita’i o tautua tau upufai o malo i totonu o atunuu o le Pasefika.
