O le afioga i le Minisita o Galuega Tetele o ia foi o le tasi o Sui Palemia, afioga Toelupe Maoiautele Poumulinuku Onesemo o loo ta’ita’ia le usugafono a Samoa i le tauaofiaga lona 80 o le fono faaletausaga a Malo Aufaatasi o loo usuia i le aai o Niu Ioka i Amerika.
O le vaiaso nei o loo faagasolo ai lea fono faavaomalo ma o loo aofia i le usugafono le Ofisa Sili o le Matāgaluega o le va i fafo ma fefaataua’iga le afioga Peseta Noumea Simi, ma le ofisa sili lagolago o lea matāgaluega o Miriama Betham Malielegaoi.
O loo iai foi le faamoemoe e pei ona faailoa mai e le ofisa sooupu o le malo i se pepa o faasalalauga, o le a auai ane ai ma le Amepasa o Samoa i Amerika o ia foi o le sui o Samoa i Malo Aufaatasi le afioga Fatumanava-o-Upolu III Dr Pa’ōlelei Luteru.
A o toesea ai le afioga i le Palemia ma le Sui Palemia ma le atunuu, o le tama’ita’i Minisita ma o le Minisita o Tupe le afioga Mulipola Anarosa Ale Molioo o loo tauaveina tiute o le palemia.
