O loo mafatia pea si tinā e ona lana tama teine e 17 tausaga le matua, lea na maliliu faatasi ma se alii e 20 tausaga le matua, mai se faalavelave tau taavale na so’a ai e le taavale na latou iai i totonu, se pou mōlī a o iai le alii na aveina le taavale i aafiaga o fualaau faasāina ma mariuana.
O le asō lea na tula’i ai le alii o Kyan Stack i le Faamasinoga Faaitumalo i Kalaiesetete mo le lauina o lona faasalaga mai le faalavelave lea na maliliu ai nei talavou e to’alua i le masina o Ianuari.
Na molia i le faapogaia o maliliu o i la’ua e to’alua a o aafia ai lenei alii i fualaau faasāina.
Fai mai le faamatalaga a si tinā i totonu o le fale faamasino, le faalavelave na tula’i mai, e leai se isi o le latou aiga na tapena iai e talia lenei tala faavauvau.
Fai mai le tinā, e tele fuafuaga sa faatulaga e si ana tama mo lona olaga, ma o se teine e ola fiafia.
Na ta’ua e le tamā le matuā faigata ona talitalia faanoanoaga ua latou fesaga’ia, ma fai mai le tamā e matuā manatu faapito gaioiga na faia e Stack ma e tatau ona sala; ma e na te lē faamagaloina Stack i le mea na tupu.
Ua faatula’i mai e le loia a leoleo le sala faafalepuipui e amata mai le lima i le ono tausaga; ae o le manatu o le loia o loo tula’i mo Stack, ua lagona e lana client le matuā salamō ma e mana’o e faatoese; o se alii talavou ma e le’i matua le mafaufau ua sese ai ana faai’uga e fai ma tula’i mai lenei faalavelave mata’utia.
E iai isi vala na ta’ua e faaopoopo i māfua’aga o le faalavelave e pei o le le’i toe agavaa le taavale e fealua’i i luga o le auala i le lua masina muamua atu a o le’i tupu le faalavelave, ae o le māfua’aga autū lava o le avetaavale saoasaoa.
O le faasalaga o le alii o Stack e pei ona faalau ane i le faamasinoga, e 12 masina e faasala saisaitia ai i le fale poo le home detention, e 150 itula e faia ai ni galuega mo le lelei o tagata lautele poo community service ma ua se’ia foi lona laisene avetaavale mo le 12 masina, ma faatonu ai ina ia totogi le $14,000 mo a’iga ta’itasi o aiga e lua ia ua maliliu o latou tagata.
Puna o Faamatalaga: https://www.rnz.co.nz/news/national/572852/every-day-i-wail-mother-s-heartbreak-after-drugged-driver-killed-daughter
