E le taumate o le a lē lelei le faamanatuina o le Kerisimasi mo nai aiga ua aafia fale ma meatotino i uiga louloua o le tau ua aafia ai vaega o Kuiniselani.
O lologa ua lipotia i le asō ua faaleagaina ai le tele o fale ma ua faafaigata ai feoaiga mo le faaoo atu o fesoasoani i tagata
Fai mai le komesina o leoleo i Kuiniselani, Katarina Caroll e uigaese lea lologa ma o se luitau tele mo i latou o loo galulue i le laveaiina mai o tagata poo le rescue crew.
Fai mai le komesina e matuai malosi timuga ma ua silia 300 valaau mo se fesoasoani i le laina a leoleo ae o le itu e faafetai ai ona e lei iai se soifua ua lipotia ane ua ma’umau.
O faaitu e pei o Cairns na aafia foi i lologa aemaise i le vaega o iai le malaevaalele.
O le saunoaga a le premier o Kuiniselani Steven Miles ua ta’ua ai o loo galulue le Navy ma le vaega o le puipuiga a Ausetalia e tuuina atu le lagolago ma le fesoasoani i tagata ua aafia fale ma mea o loo aumau ai.
Ua iai foi nisi i le komiuniti ua faatulaga sailigatupe e fesoasoani ai mo nai aiga ua aafia aemaise ua lalata mai le Kerisimasi.
O le lipoti mai le fuimu ma le SES i Kuiniselani ua ta’ua ai e silia ma le afe valaau mo se fesoasoani na maua atu i totonu o le 24 itula ua tuanai atu.
