Na molimauina e le to’atele o ‘avetaavale le umi o le taimi o poloka auala i luga o le motorway i Saute – Southern Highway 1, e aofia ai Princes Street East ma Highbrook Drive i le Aso Lua o lenei vaiaso.
Māua i lipoti a le Ofisa o Leoleo i Counties Manukau, na logoina atu lo latou ofisa i se matāupu, o se tagata ua maliu.
Faamauina ina ua taunuu atu leoleo i lea faaitu, na o latou maua le tino o se alii o loo taatia i autafa ane lava o le auala savali (walkway).
E tusa ai ma faamatalaga mai le ofisa o leoleo e tauala mai i le latou itulau i luga o upega tafa’ilagi le social media, a o faatino iloiloga a malu o le malo, na o latou maua ai se meatotino i autafa ane lava o le tino maliu o lea alii.
Na faamatala o lea meatotino e pei e foliga mai o se ‘au’upega malosi poo se ituaiga pomu (explosive devices).
Ina ua maua e malu o le malo lea meatotino, na vave loa ona tapunia ia itu auala, e pei ona molimauina ai e le to’atele o tagata femalagaa’i na faatuai ona aga’i o taavale.
Ona o le ogaoga o vaega na maua, o lea na aga’i atu ai sui o le vaega Police Specialist Search Group ma NZDF EOD e faatautaia sa’ili’iliga ma iloiloga.
Faaalia ma faamaonia le aveese ai o lea meatotino.
Ma e tusa ai ma iloiloga ua faapena ona faamaonia e lē o se ituaiga ‘au’upega o le IED.
Ta’ua i le pepa o faamatalaga o loo galulue ma le pule o maliu Coroner, nei e sa’ili faamaumauga e tusa ai ma le maliu o lē na aafia.
Ae o loo faatino su’esu’ega faafoma’i a le pule o maliu i le tino o le alii ua fano lona ola.
Na faafetaia e malu o le malo tagata lautele aemaise o tagata femalagaa’i mo le lagolago a o faatautaia su’esu’ega.
Puna o Faamatalaga: https://www.facebook.com/share/p/1DyocpFxpQ/
