Ua tatala aloa’ia nei le isi itu o le malaevaalele, ma o lenei galuega o le faalauteleina o le malae mo vaalele poo le airfield i Aukilani.
Ma ua faamauina o se galuega aupito i telē ma maoa’e, talu ai o se taimi muamua lea ua mafai ai ona faatino lenei galuega talu ona fausia le malaevaalele i le tausaga e 1966.
Faamaonia, e $465 miliona tālā Niu Sila le tau aofa’i o lenei poloketi, ma i le faalauteleina o le malae mo vaalele a fua i le telē pe tusa lea ma le 23 malae lakapi tetele.
Ua mafai ai ona maua le avanoa mo le oo atu i le 11 o vaalele i le ituaiga o jets, faaopoopo ai ma vaega e faatino ai galuega mo le vaaia lelei o vaalele e lima poo serviced flexible stands – e fesoasoani atu lea e faamautū ma paka lelei ai vaalele e uumi taimi e mālōlō ai i totonu o le atunuu; aemaise ia ‘aua ne’i faalavelaveina ai foi i isi vaalele o le a tuua mo a latou faigāmalaga.
Faaalia e le Pule Sili o le auaunaga i le malaevaalele ia Carrie Hurihanganui, o lenei galuega o se pine faamau lea i le aga’i pea i luma o atina’e o le auaunaga aemaise i le maua ai o le avanoa e oo mai ai i totonu o le atunuu nisi o vaalele faavaomalo.
Ta’ua i le pepa o faamatalaga a le Auckland Airport, o lenei vaega faaopoopo ua fesoota’i sa’o lea i le itu e avatu ai uta mo atunuu i fafo poo cargo – o se faiga ua manatu e saga faamausalī ai pea ma faaolaola ai sootaga mo fefaataua’iga a Niu Sila e pei ona faatino ai e faamauina e $26 piliona, ma le faamoemoe o le a faatupula’ia i le $41 piliona.
E tusa ai ma ripoti, o lea ua mae’a lenei galuega ae o lea ua faamauina le maua ai loa o le avanoa e faatino ai le fausiaina o se itu e mo faigāmalaga e aga’i ese mo jets poo le domestic terminal.
Na amata faatino mai le fausiaina ma le faalauteleina o lenei malae i le tausaga 2019, peita’i na taofi ona o aafiaga o le atunuu ma le lalolagi i le faama’i o le Koviti-19, ma e faamauina sa mafai ona faafaigaluega ai le oo atu i le 600 tagata i lenei galuega.
