O osofa’iga a Lusia sa faatino i le po anapo i Kyiv i Ukraine ua lipotia ua fasiotia ai tagata e silia ma le 20 ma o se tasi lea o ana osofa’iga tele i le laumua lea o Ukraine.

Faamaonia mai e le State Emergency Service of Ukraine i le CNN a itiiti mai pe to’a 28 tagata na fasiotia ma le silia ma le 100 o loo manunu’a.

O le isi osofa’iga na aafia ai se fale tele na matua’i vaeluaina lava ma e to’atele na maliliu ai i le faalavelave lea.

Fai mai ua faifaitetele osofa’iga a Lusia e faaaogā ai drones.

O le faamatalaga mai le Ea Fosi a Ukraine ua ta’ua ai e 428 drones a Lusia na o latou faatama’iaina i le po anapo.

Ua lapata’i ane Amerika e ono faaaogā e Lusia faiga faaonaponei ma satelite faatekonolosi faatasi ma Korea i Matu e faaauau ai osofa’iga ia Ukraine.

Puna o Faamatalaga: https://edition.cnn.com/2025/06/17/europe/kyiv-deadly-strikes-trump-g7-intl-hnk