Ua iai le maliega ua faia e Lusia ma Ukraine e faatatau i le fesuia’i o a la pagota i le isi faatalanoaga e faia i Istanbul i le Aso Lulu ae e foliga e lē o tele se aga’i i luma i le matāupu e faatatau i le taofia o le vevesi i le va o atunuu e lua poo se fonotaga foi i le va o Peresetene.
O le feiloa’iga sa faia i le mae’a ona tuuina e Trump o le taimi e 50 aso ia Moscow e tatau ai ona maua se filemu i le va o atunuu e lua, pe o le a feagai loa ma tariffs poo lafoga faaopoopo i oloa.
E le’i faamaoniaina aloa’ia e Putin ia faamatalaga mai ia Trump ae o loo faaauau pea foi ona faia osofa’iga a Moscow i aai o Ukraine.
Saunoa lē sa avea ma minisita o le puipuiga a Ukrain, Rustem Umerov ua ia faatūina atu le faia o se fonotaga i le faai’uga o Aokuso i le va o Zelensky ma Putin.
Ua ta’ua pe ā ma le 250 pagota o taua o le a fefaasuia’i ai i le maliega lea e pei ona mae’a saunia.
E lē o mailoa la pe o le ā se tali ane a Lusia i nei feutana’iga ma Trump ae talitonu e na o ta’ita’i lava e to’alua o Zelensky ma Putin e maua ai le tonu sa’o o le nofo filemu.
Puna o Faamatalaga: https://edition.cnn.com/2025/07/23/europe/russia-ukraine-peace-talks-third-round-turkey-latam-intl
