A o tulituliloa pea e le to’atele le matāupu i le va o Ukraine, Lusia ma Amerika, ua faailoa i se lipoti lata mai i le vaiaso nei, e ui i feutana’iga ma maliega sa faia talu ai e faatatau i le toe faafoi ane o tagata sa ave faapagota i le taimi o le vevesi i le va o itu e lua, aemaise o le taofia lē tumau o fetauiga, peita’i e foliga o loo va lava le fogāvaa ia Lusia ma Ukraine ma e lē o ataata mai lava se taimi vave e ono faamuta ai lea vevesi.
Fai mai o talanoaga sa fuafua mo le vaiaso nei e le’i taunuu i se lelei ona sa tuuina ane pea e Lusia ona mana’oga ia Ukraine ina ia aga’i ese mai ma faaitu o loo fuafua Lusia latou te ave faamalosi pea.
E iai ma le lisi o mea o loo manana’o pea Lusia e ao ona faatino e Ukraine ona faato’ā aga’i lea i se tulaga e maua ai se to’a i lea itu o le lalolagi.
Fai mai le CNN o loo faaauau pea le finau a Lusia e ui e iai vaega tāua e lua ua maitauina i le vaiaso nei i le tali ane a Ukraine, e lē gata ina mafai ona o latou faataunuu le osofa’iga tele e faaaogā ai drones ma faaleagaina ai le tele o vaalele a Lusia ae ua mautinoa foi ua faatupula’ia le lē fiafia o le Peresetene o Amerika ia Putin ona e foliga e lē o usita’ia pe tausisia foi tuutuuga sa o la talanoa ai mo le faamutaina o le taua i Ukraine.
E lē o mailoa la i le aga’i atu i le ogatotonu o lenei vaiaso poo le ā se tali ane a Trump i le matāupu lea ae pe o le ā foi le isi laasaga a Ukraine o le a faia i mana’oga faifaipea o Lusia.
Puna o Faamatalaga: https://edition.cnn.com/2025/06/02/europe/putin-ukraine-peace-talks-trump-latam-intl
