Ua faailoa faalaua’itele e Lusia i le amataga mai o lenei vaiaso ua faaauau pea ona una’i atu a latou vaega’au i le ogatotonugalemu o Ukraine i le faaitu o Dnipropetrovsk, o se nofoaga sa latou taumafai e laasia mo ni masina i se gaioiga e ono afua ai nisi o faafitauli fou mo Kyiv.
Na faailoa e le matāgaluega o le va i fafo a Lusia ua o latou laasia nei se tasi o vaega tele o Ukraine ma ua mātele ina nofoia e ana vaega’au ia faaitu.
Peitai na saunoa le sooupu a Ukraine o Viktor Trehubov i le CNN, o loo faasalalau e Lusia faamatalaga sese e faatatau i le matāupu lea.
O le faaitu e pei ona ta’ua e tuaoi ma isi faaitu tetele e tolu o Ukraine, o Donesk, Kherson ma Zaporizhzhia o lea foi ua fāoa e Lusia isi vaega.
Fai mai o le faamoemoega o Lusia ina ia fāoa uma itu ia e tolu a o le’i faasolo atu i le isi itu tele o Ukraine o Luhansk.
Fai mai lipoti o le taimi ua toe malosi le alu o fetauiga i Ukraine talu mai le osofa’iga malosi a Ukraine ia Lusia sa faaaogā ai drones i le vaiaso talu ai a o faatalitali pea nisi i le faagasologa o nisi o talanoaga o loo feta’ua’ina pea i le va o sui o malo e lua aemaise isi atunuu tetele e pei o Amerika o loo ogatotonu ai i le sa’iliga o se filemu mo lea itu o le lalolagi.
Puna o Faamatalaga: https://edition.cnn.com/2025/06/08/europe/russia-claims-offensive-dnipropetrovsk-intl
