Ua faatinoina nei le ulua’i petolō fai faatasi o vaamaulu a Lusia ma Saina i le Pasefika e pei ona lipotia mai e le CNN i ni lipoti na faailoa e le aufaasalalau a ia atunuu.
Fai mai o le petolō lea o vaamaulu alu i le kiso ma le eletise na amata i le amataga o le masina lenei o Aokuso ma ua faaopoopo atu iai ma vaamaulu a Lusia e faaigoa o le Volkhov lea e faapea pe ā ma le 2 afe maila na kava i lana faigāmalaga mai le nofoaga na faamautū ai.
Ua ta’ua e le CNN o vaamaulu ia na petolō i ogasami o le Sea of Japan ma le East China Sea ma e ui e le’i faamaonia mai e Saina le petolō lea peita’i o loo lipotia i le Global Times a lea atunuu ua faailoa ai o lea faiga fai faatasi a Saina ma Lusia ua faailoa ai le maualuga o le tulaga ua iai le faatuatuaga i le va o ia atunuu.
O le tausaga e 2021 na mua’i lipotia ai le galulue faatasi foi o Saina ma Lusia i petolō sa faia e le vaega o le Navy a o la atunuu i le itu i Sisifo o le Pasefika ma amata mai ai lava le faia o ia petolō ta’i tausaga.
Puna o Faamatalaga: https://edition.cnn.com/2025/08/28/asia/russia-china-joint-submarine-patrol-intl-hnk-ml
