Ua ta’ua i lipoti a le CNN i le asō le pule i le soifua o lē sa avea ma Minisita o Felauaiga a Lusia, i ni nai itula talu ona faamalolo mai le galuega e le Peresetene o le atunuu, Vladimir Putin.
O le Minisita o Roman Starovoit na faamalolo i le amataga o le vaiaso nei ma sa faalauiloa foi le faia o lea faaiuga i luga o le upega tafailagi aloaia a le Kremlin ma tofia ai le Sui Minisita o Andrey Niktin e fai ma minisita.
Ina ua fesiligia se sooupu a le Kremlin e le au tusitala i le mafuaaga o le faamalolo o Starovoit na faailoa e le sooupu e le faapea ua mafua ona faamalolo ona o le lē faatuatuaina.
O le faamatalaga mai le Komiti Su’esu’e a Lusia i le mataupu lea ua ta’ua ai na maua atu le tino maliu o le alii minisita i totonu o se taavale i le faaitu o Moscow, e iai manuaga mai se fana ma o loo faia nei le su’esu’ega.
Ua faailoa foi i lea lava lipoti e iai foi leisi tagata faigaluega a le Matagaluega lava lea na maliu foi i le aso ananafi ma o loo masalomia o se faaletonu i lona fatu ma e le o iai se faamaoniga pe iai se sootaga o ia mataupu.
O nisi lipoti mai le CNN ua taua ai sa lipotia e le au faasalalau mai Lusia o le ua maliu o Starovoit o loo taua lona suafa i se suesuega e aofia ai tupe a le malo ma sa faia iai se su’esu’ega.
Puna o Faamatalaga: https://edition.cnn.com/2025/07/07/europe/russian-minister-suicide-intl
