O le mae’a o le galuega a le faamasinoga na toe faitau ai palota o le filifiliga a le itumalo o Palauli 2 i le motu tele i Salafai, ua faailoa ai nei e le Komesina o faigāpalota se suiga mai le aofa’iga o palota a le sui tauva na tulaga muamua ma le sui tauva na pito iai, peita’i o lea suiga ua faamautū ai pea le manumālō o le sui ua filifilia le tofa Fiu Faaolatane Ponifasio Vasa i le aofa’iga e 634 palota, ae tulaga lua ai lava le sui tauva na talosaga i le faamasinoga mo se isi faitauga o palota le afioga Faaolatane Fiu Tuala Iona Pa’ō i le 632 palota na ia maua.
O le faitauga aloa’ia na manumālō ai Fiu Faaolatane Ponifasio Vasa i le palota e tasi lea sa ia maua palota e 632 ae pito iai palota e 631 na maua e Faaolatane Fiu Tuala Iona Pa’ō.
O le tasi o talosaga mo le toe faitauina o palota o le filifiliga a le itumalo o Aleipata Itupa i Luga ua lipotia le faatumauina o le manumālō o le sui filifilia mo le nofoa o lea itumalo le afioga Taufua Edmund Taufua.
O se tasi lea o nofoa o itumalo faapalota e 31 i Upolu ua umia e le vaega faaupufai o le Faatuatua i le Atua Samoa ua Tasi, ae sa tula’i ai i le paea’iga 17 a le Palemene le sui faipule sa lagolago i le vaega faaupufai e puipuia aiā tatau a tagata, le afioga Fuaava Saumalu Suluimalo Amataga Penaia.
E tuufaatasia lenei lipoti e le’i faailoaina faalaua’itele e le Komesina o faigāpalota le aofa’iga o palota mo le sui ua filifilia ma le sui tauva na talosaga mo se toe faitauga o palota mai le filifiliga a le itumalo o Aleipata Itupa i Luga.
