O lumāmaota o le Malo i le eleele fou i Apia o le a avea ma nofoaga e faagasolo ai le sauniga faalemalo, mo le sisiina o le fu’a e faamanatu ai le 63 tausaga o le malo tuto’atasi o Samoa i lenei tausaga.

O le feiloa’iga a le ta’ita’ifono ma sui o le soākomiti o le tuto’atasi na faailoa ai le polokalame, lea e lua aso amata i le Aso Sa le aso muamua o le masina fou o Iuni ae faai’u i le Aso Gafua le aso 2 o lea lava masina.

O le sauniga lotu i le malumalu o Maria Imakulata o le Ekalesia Katoliko i Mulivai i Apia e tatala ai polokalame, o le a faatautaia e le Fono a Ekalesia Soofaatasi.

O le Aso Gafua o solo faaaloalo masani a a’oga ma faalapotopotoga ma sisiina o le fu’a a o faapāpā fanafanua e 21 e le vasega o malu o le malo.

O le 4 o le afiafi o le aso lava lea o le sauniga a leoleo mo le tuuina i lalo o le tagavai o le malo o Samoa ma mae’a ai sauniga uma.

O le Kovana ma lona faletua mai le faigamalo a Amerika Samoa faapea le Ulu o le malo o Tokelau o malo valaaulia ia o le Sisigafu’a o lenei tausaga.

Ua faaalia e le ta’ita’ifono o le soākomiti o le tuto’atasi le tofa Agafili Tomaimano Shem Leo, ua iai le faiga faavae e ta’i lima tausaga ma tapena se polokalame tele o le tuto’atasi ma o le Sisigafu’a o le tausaga e 2027 e faatino ai lea fuafuaga.