Ua pu’eina nei ma taofia e leoleo se alii ina ua māua lona taumafai e talanoa atu i ni teineiti a’oga i Kalaiesetete ma faapele i tupe mo le faia o ni amioga lē tatau.
O le aso 4 o le masina lenei o Aokuso na lipotia ai i leoleo se alii o loo taumafai e talanoa atu i teineiti a’oga i le faaitu o Merivale ma St Albans.
Talu mai lena aso, sa iai foi isi lipoti na toe oo ane i leoleo i le faaauau pea ona faia e lenei alii ia amioga faasolitulafono.
E 11 ni a’oga i lena faaitu na lafo atu iai e leoleo se tusi e lapata’ia ai ina ia nofouta i lea soligatulafono na lipotia.
Ae o ananafi la, Aso Lua, 26 o Aokuso, na faia ai se faasilasilaga a leoleo, ua latou loka maia le alii o Leo Darin Goodwin, e 53 tausaga le matua, ina ua oo ane ia i latou lipoti i se “tagata o loo masalomia” ana amioga a o taumafai e talanoa atu i teineiti a’oga.
O ananafi foi la na tula’i ai lenei alii i luma o le Faamasinoga Faaitumalo a Kalaiesetete i moliaga o lona solia o tuutuuga o le avanoa sa tatala ai i tua.
E tusa ai ma lipoti, sa iai ni moliaga muamua o lenei alii i faiga sauā ma le faiaiga faamalosi i tama’ita’i i tuā i vaitausaga mai le 1990 ma na faia foi iai ni faasalaga.
O le tausaga e 1994 sa falepuipui ai foi i Ausetalia Leo i moliaga o le taumafai e faafefe se tama’ita’i i se ‘au’upega mata’utia mo ni faiga aiga faamalosi.
Ae o le toe tula’i mai ai o soligatulafono a lenei alii, na momoli le faafetai a leoleo i le komiuniti i lo latou mataala ma faailoa ane faamatalaga na mafai ai ona maua lenei tagata.
O se faamanatu foi lenei mo mātua ina ia a’oa’o lelei a latou fanau i auala e mataala ai mo lo latou saogalemu, i taimi e savavali atu ai i le a’oga ma toe foi ane i aiga, ma ia vili le 111 pe a iai ni mea latou te ono atugalu ai mo le saogalemu o i latou faapea ma isi.
Puna o Faamatalaga: https://www.rnz.co.nz/news/national/571095/man-arrested-after-approaching-christchurch-school-girls-asking-for-inappropriate-favours?cid=newsletter
