O le ogatotonu o le masina lenei o Me na muamua vaaia ai i luga o fesoota’iga i le api o foliga le facebook, faasalalauga e faatatau i se taavale o se van lanu pa’epa’e ma le tala o loo ave faananā ai ni teineiti ma ni tamaitai.
Ua faaalia e le Matāgaluega o Leoleo, Falepuipui ma le Toefuata’ina ua mae’a ona su’esu’e ma soalaupule lea tulaga ma tagata sa faia ia faasalalauga.
Peita’i o le fautuaga a leoleo, a toe molimauina ni vaaiga faapea poo le masalomia foi o sea tulaga, ona logo sa’o atu lea i le ofisa ae aua ne’i toe faasalalauina i le api o foliga.
Ua molimauina e leoleo ua iai ma nisi o faasalalauga taufaasese ua faia ai i luga o lea auala o fesoota’iga.
E oo mai i le taimi nei e le’i maua e leoleo ni faamaoniga o ia faasalalauga.
