Ua amata faagasolo i lenei vaiaso i ogasami faatulafonoina o Samoa le a’oa’oga o galuega o le puipuiga ma le saogalemu o le gataifale o le Pasefika, o loo auai vaa leoleo e lima e aofia ai le vaa leoleo o le Nafanua III.
O le tama’ita’i Palemia o le malo tausi afioga Fiame Naomi Mataafa na saunoa e tatala aloa’ia i le Aso Gafua o lenei vaiaso le amata ai o lea a’oa’oga o loo auai auvaa o vaa leoleo e lima mai atunuu o le Pasefika o loo aofia i le polokalame o le puipuiga a le malo o Ausetalia ae lagolago iai ma le malo o Niu Sila.
O loo auai foi ma sui sinia o le ofisa o le pulega o faigāfaiva i le Pasefika o se tasi o auaunaga o loo faamalosia tulafono faavaomalo mo le puipuia o ogasami faatulafonoina o atunuu o le Pasefika.
Ua faaigoaina lea a’oa’oga o le Operation Ika Moana ma sa faia foi ma talimalo ai nisi o atunuu e pei o le Atu Kuki i tausaga ua tuana’i, ae o le taimi muamua lea ua faia mai ai i Samoa.
