E lima pati faaupufai ua faamautū le lesitala i le ofisa o le komisi o faigāpalota ma ua iai le talitonuga o le a tauva sui faatutū o ia vaega faaupufai i le palota tele o loo tapena iai le atunuu.
O ia pati ua aofia ai le Vaega e Puipuia Aiātatau a Tagata, o le Faatuatua i le Atua Samoa ua Tasi, Samoa National Development Party le SNDP, Democratic Republic Party, ma le pati fou o le Samoa ua Potopoto le Samoa Uniting Party.
Ua faailoa mai e le Komesina o faigāpalota e iai nisi o pati faaupufai e lua o loo faamoemoe e lesitala i le vaiaso fou, ma o le faamoemoe foi o ia vaega faaupufai e tauva o latou sui i le faigāpalota.
O le pati faaupufai o le Tautua Samoa ua soloia le lesitala ona o aiaiga faaletulafono ua lē tausisia.
O le Aso Tofi lenei i Samoa ua faalauiloa aloa’ia ai le vaega faaupufai fou o le Samoa Uniting Party lea ua faamaopoopo iai minisita o le malo tausi e aofia ai ma le Palemia, ma o le a tauva ai i latou i le faigāfilifiliga a Samoa o le a toe sa’ili ai ni sui usufono o le paeaiga fou a le Palemene.
