Ua sau i tua le faasilasilaga mai le ofisa o le Komesina o faigāpalota e tauala mai i le nusipepa aloa’ia a le Malo, le Savali, ua faalauiloa mai ai le lesitalaina aloa’ia o se tasi o vaega faaupufai fou mo le alo atu i le faigāpalota a le atunuu i le masina o Aokuso.
O le pati poo le vaega faaupufai ua faaigoaina o le Samoa Labour Party (SLP) lea ua lesitalaina aloa’ia i le Aso Faraile, aso 6 Iuni 2025, ma saini mai ai le Komesina o faigāpalota, le afioga ia Toleafoa Tuiafelolo A. John Stanley.
Ua tusia nei la lenei vaega faaupufai i le Tusi Resitala e tusa ai ma aiaiga o le fuaiupu e 3 o le Tulafono o Faiga Palota 2019.
O le taimi nei o lea ua 6 vaega faaupufai poo patī ua faailoa mai le lesitalaina aloa’ia, o le Faatuatua i le Atua Samoa ua Tasi (FAST), o le Human Rights Protection Party (HRPP), o le Samoa Uniting Party (SUP), o le Samoa National Development Party (SNDP), o le Democratic Republic Party (DRP), ma le Samoa Labour Party (SLP).
O le vaega faaupufai lenei a le Samoa Labour o loo lesitala o lona Peresitene, o lē sa avea o se tasi o Minisita o le Kapeneta i le faigāmalo a le HRPP i le paeaiga lona 16, o lona Failautusi o se tasi foi o sui sa tauva i lalo o le fu’a a le HRPP i le faigāpalota o le 2021 ae le’i manuuia ana taumafaiga, ma le Teutupe o se tasi sa avea ma sui Faipule o le vaega lava a le HRPP i lena paeaiga lona 16 a le Palemene.
