Sa silafia lava e le alii taalo o Christian Lealiifano o le a iai le taimi o le a taalo ai faasaga i lana kalapu o le Brumbies ile taamilosaga oloo loma a le Super Rugby, ae lei iai sona manatu e ono fetaui ile uluai vaiaso o le taamilosaga.
O Lealiifano lea ua saini ile Moana Pasifika ma ua ia faaalia ua ia fiafia ma faatalitali foi I lea taaloga mataina, le uluai taaloga a le Moana Pasifika.
Fai mai a ia o le Brumbies o se kalapu sa avea ma se vaega tele o lona olaga ma o le a tumau pea lona taua ia te ia. Taua ile lipoti mai le RNZ Pacific o loo iai nei Lealiifano ile tulaga o le sauniuni ma tapena mo le agai mai i Aukilani ma lona aiga ina ua saini ile Moana.
O le aso 18 o Fepuali le taaloga lea, ole uluai taaloga lea ale Moana Pasifika i lea tausinioga ile malae i Mt Smart ma ole a talamalae ai le Moana Pasifika ma le Brumbies. Fai mai Lealiifano e fiafia lava e toe foi mai i Tamaki Makaurau ma fai ma sui o lona aiga ile faagatama ole lakapi.
