O lea ua mae’a galuega a le Faamasinoga o Talosaga Toe Iloilo a le Faamasinoga Sili a le atunuu, ma o se tasi o matāupu sa iloilo ai, o le talosaga apili a le afio’aga o Afega sa autū i se vaega o le faai’uga a le Faamasino Sili na aumai i le aso 9 o Aperila o le tausaga na te’a nei 2024, e faasino i ni saunoaga a le Faamasino Sili i lea faai’uga sa atagia ai i le silasila a le itu talosaga sa iai lo latou faanaunauga e faatino se gaioiga e tafiesea ai aiga e 18 o Leauvaa.
Sa apili foi e Afega le faai’uga a le Faamasinoga Maualuga o le aso 11 o Oketopa o le tausaga na te’a nei na faia ai se faatonuga e taofi i se tulaga lē tumau le galuega o le fuaina o tuaoi o eleele o lea afio’aga e pei ona sa faaulu ai e le nuu o Leauvaa se talosaga i le Faamasinoga Maualuga.
Peita’i o le talosaga apili i lea vaega o le faai’uga na toe faaui i tua.
I le silasila a le Faamasinoga o Talosaga Toe Iloilo poo le Faamasinoga Apili a le Faamasinoga Maualuga, e leai sona malosi’aga faaletulafono e iloilo ai le apili faasaga i se finagalo o le Faamasino Sili i le faai’uga o le masina o Oketopa o le tausaga ua mavae.
Ua faatumau ai le faai’uga a le Faamasinoga Maualuga ua taofia lē tumau ai le galuega o le fuaina o eleele o Afega e pei ona sa faatali i le taimi e faatūina ai le Faamasinoga o Talosaga Toe Iloilo ma apili le Lands and Titles Court of appeal and review a le Faamasinoga o Fanua ma Suafa.
Peita’i o lea ua faamautū e lea faamasinoga le palota a le Fofoga Fetalai na pasia ai le lua vaetolu o teuteuga o le faavae 2025 ma pasia foi e le Palemene teuteuga o le tulafono o fanua ma suafa 2025, ua lē taunuu ai le faatūina o lea faamasinoga, ae toe foi i tulaga sa iai muamua o le faaulu o se talosaga i le Faamasinoga Maualuga e iloilo ai ni faai’uga a le Faamasinoga o Fanua ma Suafa, e mafua i ni finauga i le aafia o le aiā tatau o ni tagata poo se tagata ona o se faai’uga a lea faamasinoga o loo su’esu’eina matāupu tau eleele faaleaganuu ma suafa matai.
