Na toe lūlū foi i Lusia se mafui’e tele, o lona malosi e 7.8 i le fua mafui’e ma lona loloto e tusa ma le 10 kilomita, i le taeao nei i le itula e 7 i le taimi a Niu Sila.
O lenei mafui’e na lūlū i le talafātai i Sasa’e o le nuu e ta’ua o Kamchatka i Lusia.
Na ta’ua e se sooupu mo le National Emergency Management Agency, sa vave ona faia su’esu’ega o lenei mafui’e tele, e le vaega a le Earth Sciences NZ ma le National Emergency Management Agency ina ia vaai pe ono iai se lamatiaga mo Niu Sila i le tula’i mai o se galulolo.
O lenei mafui’e na lūlū tonu i le vaipanoa lea na lūlū ai le isi foi mafui’e tele e 8.8 le malosi i le fua mafui’e, lea na lūlū i le aso 30 o Iulai na se’i mavae atu nei, na aumai ai foi lapata’iga i le tele o atunuu e aofia ai ma Niu Sila, ina ia sauniuni mo le ono osofa’i mai o ni galulolo.
O se lipoti lata mai a le Newstalkzb, ua lē o iai nei se lamatiaga o se galulolo mo Niu Sila, e ui sa vaaia ni galu e oo atu i le 1 i le 3 mita le maualuluga nai lo galu masani i nisi vaega o le talafātai o Lusia, e tusa ai ma se sa’ili’iliga a le NWS Pacific Tsunami Warning Centre.
E oo mai i le taimi nei e le’i matuā faamautinoa pe o iai se lamatiaga o se galulolo mai lenei mafui’e tele e ono lamatia ai Hawaii.
Puna o Faamatalaga: https://www.newstalkzb.co.nz/news/world/earthquake-off-eastern-russia-tsunami-waves-possible-for-some-no-threat-to-nz/
