O le lipoti a le failautusi o le fono aoao na ave i le Ao o le Malo i le aso 27 o Me, lea sa logoina ai le teena o le tala o le tupe, sa ave ai ma le fautuaga a le failautusi le susuga Satama Leatisa Uitime Tala, e suia le tofiga Palemia i le ta’ita’i o le vaega faaupufai o le Faatuatua i le Atua Samoa ua tasi ona o ia lea ua iai le numela fulisia e 29 e faaauau ai le pulega malo a le Faatuatua i le Atua Samoa ua Tasi.
Peita’i e pei ona silafia o le fautuaga a le Palemia i le Ao o le Malo e faatā’ape le Palemene ona ua lē faatuatuaina le faigamalo i le teena o lana tala faatatau o le tupe, na talia e le afioga i le Ao o le Malo, afioga Tuimalealiifano Vaaleto’a Sualauvi II.
Ua faailoa e le Loia Sili i lana tusi na ave i le failautusi o le fono aoao faitulafono, e leai sona malosi’aga faaletulafono e fautuaina ai le Ao o le Malo i le suia o se Palemia.
O loo faailoa atu e le Loia Sili i le failautusi e le’i faia se lafo i taualumaga a le fono aoao e mautū ai sea tulaga i se tasi ua iai se numela fulisia e tauave ai le tofi Palemia ma le faaauauina o le pulega o le malo.
Ua faailoa lautele mai foi e le Loia Sili le tusi a le Fofoga Fetalai na ave i le Ao o le Malo i le aso 27 o Me lea na teena ai le tala o le tupe, ma o loo faailoa ai foi e le Fofoga Fetalai le tulaga sa faailoa e le failautusi o le fono.
O le fautuaina e le Palemia o le Ao o le Malo e faatā’ape le Palemene o loo ogatasi ma ala faaletulafono o le faavae e pei ona faailoa e le Loia Sili i lana tusi na tuuina atu i le failautusi o le ofisa o le fono.
O le fesiligia o le Loia Sili i sona finagalo e faamanino atili ai ia tulaga sa aliali mai, ua ia aumai faalaua’itele ai ia fetusia’iga.
O le saunoaga a le Palemia tausi i le faalauiloaina o le anavatau a le vaega faaupufai o le Samoa ua Potopoto na ia afea ai foi lea tulaga.
Le Palemia tausi le ta’ita’i o le pati faaupufai o le Samoa ua Potopoto.
