Ua lē talia e le faamasinoga le talosaga e tatala ai i tua e tauala mai i le palola se alii Peretania, o loo faasala nei i le falepuipui i totonu o Niu Sila, ina ua faamaonia i le tulafono lona faia ai o ni gaioiga taufaavalea.
I lipoti mai le leitio faavaomalo a Niu Sila, e silia ma le to’a luasefulu tagatānuu Niu Sila na faavalea e le alii o Jack Hennessy e avatu ia te ia le $337,700 o seleni, e faapea o ia o se tagata malu o le malo.
Manatu le to’atele o tagata na aafia, ai o se tasi lea o su’esu’ega o loo faatino, ina ua ta’u e le alii o Jack e uma toe tuu atu a latou tupe i le faletupe pe a mae’a ona su’esu’eina tupe pepa o loo masalomia e lē o ni tupe pepa aloa’ia, ma le lilo i manatu ua taga e le alii o Jack.
I se tusi na tusia e le alii o Jack Hennessy mo le komiti iloilo na faailo ai e lea alii lona salamō tele i ana gaioiga.
Na ia faailoa lona lē fiafia ma lona iloa o le sesē o le mea ua ia faia, ma ia faaalia ai lona taumafai e avea o ia ma se tagata lelei, ma ia manatua o ia o se tagata lelei nai lo o soligatulafono na ia faia.
E ui i se loto momoia ai o le tagata i le tusi a lenei alii UK, ae le’i faapea na suia ai mafaufau o le laulau na faatautaia iloiloga o palola.
Ta’ua e i latou nei e lē o salamō mo’i le alii o Jack, ona e lē o mafai lava e lea alii ona faailoa igoa o tagata e pei ona ia ta’ua i le amataga na faaosoosoina o ia e faia ia gaioiga.
Mo le silafia ina ua maua Jack, na ia ta’u i leoleo, sa faaosoosoina o ia e faatino ia gaioiga ina ua faamata’u atu o ia i tagata o loo ta’ua e lea alii ina ua gau atu se tasi o uati taugatā tele, le Swiss watch e $200,000 le tau.
E 3 tausaga ma le 3 masina o loo falepuipui ai le alii 26 tausaga, ma e faamauina le ono tipoti ai o le alii i le mae’a ona tuli o lona faasalaga.
Ua faamauina o le to’atele o tagata na aafia i faiga a Jack Hennessy o tagata matutua mai 59 tausaga aga’i i le 92 tausaga le matutua.
Puna o Faamatalaga: https://www.rnz.co.nz/news/national/567156/uk-fraudster-jack-hennessy-stays-jailed-in-nz-after-parole-denied-truly-sorry-for-victims
