Ua lē manuia le taumafaiga a le au lakapi ta’ito’afitu a Samoa i le sa’iliga o se avanoa e toe ulufale ai i le taamilosaga autū a le lalolagi o loo taaalo ai ‘au malolosi pito i luga, ina ua malolo i lana taaloga ma Siamani i le aso mulimuli o le taamilosaga i Los Angeles i Amerika i le faai’uga o le vaiaso.

E 31 ai o Siamani ae e le’i tau ‘ai le aulakapi fitu a le Manu Samoa.

Na manumālō le tatou ‘au i le taaloga muamua ma Kenya, ae malolo i le taaloga ma Amerika.

Na toe maua le avanoa o Samoa ma manumālō i le taaloga ma Potukale poo Portugal ae na faamo’amo’a e Siamani.

Ua faaalia i lipoti mai le pulega o le lakapi a le lalolagi, o suiga fou ua faatulaga ai nei le taamilosaga lakapi fitu mo atunuu uma, o le a toe sa’ili ai se isi avanoa o ‘au ua lē manuia e pei o Samoa.

O le vaega lua poo le Division Two ua saofagā nei iai ‘au a tamaitai mai atunuu o Brazil, Saina, Kenya, ma Sepania, ae o ‘au i le vaega o alii ua sao atu ai atunuu e pei o Uruguay, Amerika, Kenya, ma Siamani.

O Samoa o le a toe amata atu lana taumafaiga i taamilosaga sa’ili avanoa ma toe taumafai ai pe maua sona avanoa i le Division Two lea ua faamanuiaina ai nisi o ‘au sa latou tausinio i le taamilosaga sa faia i Los Angeles.