O le ta’utinoga a se taulealea na ia faailoa ai i leoleo o ia na maliu ai se isi tagata o se matai, sa nonofo ma lona tina poo lona step father, ua lē mafai ona faaaogā o se vaega o mau a leoleo e lagolago ai le moliaga o le fasioti tagata faamoemoeina o loo tuua’ia ai Eneli Aturu Toalepai.
O le tasi lea o matāupu sa iloiloina e le Faamasinoga o Talosaga Apili a le Faamasinoga Maualuga a o tauaofia i le lua vaiaso ua mavae.
O le mafua’aga ua lē mafai ai ona faaaogā lea ta’utinoga o se mau a leoleo, ona o le mae’a o iloiloga na iloa ai, sa iai le lape o le faatinoga o tiute o leoleo na su’esu’eina lē o loo tuua’ia.
Na finauina e le loia mo lē o loo molia lea faatamala o leoleo i se finauga faaletulafono sa muamua tagofia e le Faamasinoga Maualuga, peita’i sa toe lu’iina le faai’uga o lea finauga i le Faamasinoga Apili e pei ona iai le i’uga ua aumai.
O loo taoto lenei matāupu tau faamasinoga e le’i su’esu’eina molimau ona sa faatali le apili a lē o loo molia.
