Ua faailoa e le ‘ausu’esu’e ma sui o le malo o Korea i Saute mai lava i le masina na te’a nei o loo vaaia pea vaaleletau a Saina ua mamao ese mai ma o latou laufanua ma faia a latou faata’ita’iga e faaaogā ai faiga faatekonolosi ua tuuina ane ai ma se fe’au e faatatau i lo latou malosi ua iai nei.

Talu mai le amataga o Me e pei ona faailoa e le CNN ua vaaia ai le vaa a le Navy a Saina o faia faata’ita’iga i le itu i Matu o le Atu Filipino aemaise le vaaia o isi ana vaa fou i ogasami o le Korean Peninsula ma le latou vaa o le Liaoning o loo faatino pea faata’ita’iga i ogasami o le Pasefika lata i Iapani.

Ua ta’ua i le lipoti faamatalaga a le ta’ita’i o Saina, Xi Jinping e faatatau ia Taiwan o le a toe ausia lava le tuufaatasia e tusa pe faaaogā ai le malosi’aga pe a mana’omia.

I se lauga a le failautusi o le puipuiga a Amerika o Pete Hegseth sa faia i le fonotaga tau le puipuiga i Singapore talu ai nei sa ia saunoa ai o soo se taumafaiga e suia le tulaga o iai le South China Sea ma iai ni faiga faamalosi e faia i atumotu i lea faaitu, o le a lē taliaina ma e tatau ona malamalama tagata uma o loo sauniuni lava Beijing e ono faaaogā lona malosi faamiliteli e suia ai tulaga paleni o malosi’aga o iai i le Indo Pacific.

Puna o Faamatalaga: https://edition.cnn.com/2025/06/16/asia/china-aircraft-carriers-pacific-intl-hnk-ml