O le lata i le 3 selau miliona tālā o tupe o loo faasoasoa nei e le malo tausi i galuega e aofia ai ma le puipuiga o le atunuu mai le pepesi o le faama’i fiva o ponaivi, ua faaalia ai e le Minisita o le Matāgaluega o le Soifua Mālōlōina, o tupe faaleoleo mo taimi o ni faalavelave faafuase’i e tutupu, ua tapatapa iai le malo, a o faia ai galuega o le togafiti o fanau ma nisi matutua ua aafia i āuga o le fiva ponaivi, aemaise le galuega o le fagaina o lotoā o falea’oga ma potu a’oga aemaise o nofoaga i nuu o loo pito maualuga ai le numela o tagata ua aafia i le vairusi o lea faama’i.
Sa maua se avanoa e fesiligia ai le Minisita le afioga Valasi Luapitofanua Toogamaga Tafito Selesele.
Ua oo atu nei le aofa’iga o tagata i Samoa ua maua i le vairusi o le fiva ponaivi talu mai Ianuari o le tausaga nei, i le 2,254.
Ae o faamaumauga mai le vaiaso ua mavae e 911 tagata na masalomia, ma e oo mai i le amataga o le vaiaso nei ua faailoa e le soifua mālōlōina e 498 gasegase mai lea aofa’iga ua faamaonia o le dengue fever poo le fiva o ponaivi ua aafia ai.
