I le fanau e to’avalu a ona mātua, o le tama’ita’i o Eileen Danielle Williams Peni e lona tolu.
O ona mātua e fai le pisinisi o le fale’aiga ma o tupe e maua ai sa totogi ai o latou pili a’oga mai lo latou laiti se’ia oo ina ulufale nisi o le fanau matutua i le Iunivesite Aoao o Samoa e aofia ai ma le tama’ita’i o Eileen.
Ina ua faatalanoa le tama’ita’i sa ia faamatala ai i le faigatā o le faasoa tau tupe a ona matua ina ua ulufale nisi oi latou i le Iunivesite aoao a le atunuu ona e fai si taugata o le pili.
O le itu lea na mafua ai ona le mafai ona faaauau lana a’oga i le semesa lua i le tausaga e 2016 a o feagai ma a’oa’oga i le vasega o le tausaga faavae poo le foundation year.
I lea motusia o lana a’oga sa taumafai ona mātua i nisi auala se’ia oo i le tausaga e 2018 ae talia loa lana talosaga e le faalapotopotoga fesoasoani a Iapani o le Yasaki Kizuna Foundation ma maua ai lana sikolasipi e faatupe ai lea faalapotopotoga agalelei le su’eina o lona faailoga tikeri.
O le naunau lava o lea alo tama’ita’i o le atunuu e faaauau lana tauiviga i le olaga a’oa’oina na toe talia ai foi e le Yasaki Kizuna Foundation le isi ana talosaga mo le isi ona faailoga, ae ua manuia ai ma lona to’alua i le fesoasoani a lea faalapotopotoga agalelei a Iapani.
O le taimi nei o loo galue le tama’ita’i o Eileen i le pulega o feoa’iga i le laueleele le Samoa Land Transport Authority i le vaega o le pulega o lea auaunaga a le malo.
O le lu’i a lea tinā talavou o se tasi o alo tama’ita’i o le atunuu i fanau o loo feagai ma a’oa’oga, e leai se mea e faigatā pe a iai le loto atoatoa e finau ai i le sa’iliga o le poto ma le atamai.
