Lata ina mae’a le faitauga aloa’ia e faamautū ai sui tauva ua filifilia

O le galuega o feagai nei ma le ofisa o le komisi o faigāpalota e ui ina fetaia’i ma nisi o faafitauli, ae ua molimauina ua lata ina mae’a le faitauga aloa’ia, ona taoto mai ai lea o le ata manino o le taunuuga o le faigā filifiliga a le atunuu.

O nisi o faai’uga ua aloa’ia sa amata ona faailoa i le afiafi o le Aso Lulu ma faasolo mai i le po anapo ua faamautū ai nisi o faai’uga.

I le itumalo o Salega 2 ua tula’i mai ai le filifilia o se sui usufono fou ma ua lē toe tula’i mai ai lē sa seei i le nofoa o le itumalo le tofa Olo Afoa Fiti Vaai.

O le afioga Leilua Sagato Karene o le sui tauva o le Faatuatua i le Atua Samoa ua Tasi ua manumālō i le aofa’iga e 342 palota na ia maua, pito iai Olo Fonoti Fiti Afoa Vaai o le patī faaupufai o Samoa ua Potopoto e 243 palota, ae tulaga tolu le sui tauva tama’ita’i o le vaega e puipuia aiā tatau a tagata le afioga Mae’e Faumuina Ualesi Falefa Silva na ia maua palota e 177.

O Faasaleleaga 5 ua lē manuia le toe taumafai o le afioga Peseta Vaifou Tevagaena sa ia umia le nofoa mo le lata i le 15 tausaga poo le 3 paeaiga faapalemene, ina ua manumālō mai ai le sui tauva o le Faatuatua i le Atua Samoa ua Tasi le afioga Vui I’iga Sione I’iga i le aofa’iga e 468 palota, tulaga lua ai Peseta Vaifou Tevaga o le sui tauva o le vaega e puipuia aiā tatau a tagata na ia maua palota e 388.

O le sui tauva tama’ita’i tuto’atasi le afioga Vui Seigafolava Ana Nora Ah Him e 76 ana palota na maua.

Ua mautū ma aloa’ia foi le faai’uga o le palota a le itumalo o Faasaleleaga 3 ua manumālō ai le sui tauva o le vaega e puipuia aiā tatau a tagata le tofa Namulauulu Sami Leota e 1,023 palota na ia maua ae o le sui tauva o le Faatuatua i le Atua Samoa ua Tasi le susuga Papalii Li’o Oloipola Ta’eu Masipa’u sa seei i le tofi ma avea ai ma Fofoga Fetalai o le Palemene, na ia maua palota e 789.

O Safata 1 ua aloa’ia le latou faigā filifiliga i le manumālō o le sui tauva tama’ita’i mai le Faatuatua i le Atua Samoa ua Tasi le afioga Seve Te’i Fuimaono i palota e 949 na ia maua.

Na tulaga lua palota e 807 na maua e le sui tauva o le vaega e puipuia aiā tatau a tagata sa seei i le nofoa le afioga Leaana Ronnie Posini ma le sui o le patī o le Samoa ua Potopoto le afioga Fepuleai Samuelu Taufao e 205 palota na ia maua.

O le itumalo o Falelatai ma Samatau ua toe filifilia le sui tauva o le vaega e puipuia aiā tatau a tagata le afioga Lupematasila Lavea Galumalemana Tologatā e 874 ana palota, tulaga lua le sui tauva o le Faatuatua i le Atua Samoa ua Tasi le tofa Teleiai Christian Ausage na ia maua paota e 667, ae o le sui tauva o le Samoa ua Potopoto, le afioga Faalavaau Fasitau Ula na ia maua palota e 146.

O Satupa’itea ua lē manuia le toe taumafai o lē sa seei i le nofoa o lea itumalo le sui tauva o le vaega e puipuia aiā tatau a tagata le afioga Lautafi Fio Selafi Purcell, ae ua filifilia mai e le itumalo le sui tauva o le Faatuatua i le Atua Samoa ua Tasi le tofa Asiata Tavu’i Tafu Salevao na ia maua palota e 476.

O le afioga ia Lautafi na ia maua palota e 375, ae o le isi sui tauva o le Faatuatua i le Atua Samoa ua Tasi le tofa Asiata Tuasivi Setu na ia maua palota e 269.

O Falealili 2 ua toe filifilia le sui tauva o le Faatuatua i le Atua Samoa ua Tasi, le afioga Fuimaono Maiava Tito Asafo na ia maua palota e 299.

Na tulaga lua le sui tauva tama’ita’i tuto’atasi le afioga Fuimaono Maria Tuatagaloa Meredith e 276 palota na ia maua, pito iai le sui tauva tuto’atasi le afioga Fuimaono Atanoa Aloalii Alex Wright na ia maua palota e 194.

O le isi sui tauva tuto’atasi o Tauaefa Autalavou Tauaefa e 119 ana palota ma le sui tauva tama’ita’i mo le vaega faaupufai o le Samoa Labour le afioga Alaifea Laititi Belford e 2 ana palota na maua.

O Aana Alofi 1 ua toe tula’i mai ai le tofa Fesola’i Apulu Tusiupu Tuigamala o le sui tauva o le Faatuatua i le Atua Samoa ua Tasi, ua na maua palota e 932.

E to’atolu sui tauva tuto’atasi sa taufetuli i le filifiliga a lea itumalo ma le sui tauva tama’ita’i o le vaega e puipuia aiā tatau a tagata.

O le sui tauva tuto’atasi o Taueva Sauvao Faafouina Mupō e 473 ana palota na maua, le sui tauva tama’ita’i mo le vaega e puipuia aiā tatau a tagata le afioga Ufagalilo Faamanū Mualia na ia maua palota e 397.

O sui tauva tuto’atasi o Fesola’i Suafo’a Tevita Apulu na ia maua palota e 131 ma le isi sui tauva tuto’atasi le afioga Leaupepetele Filipo Leaupepe na ia maua palota e 43.

O le itumalo o Sagaga 2 ua mautū ma aloa’ia le manumālō mai ai o le sui tauva o le Faatuatua i le Atua Samoa ua Tasi le tofa Fata Ryan Schuster na ia maua palota e 1,297.

Na tulaga lua palota e 899 na maua e le sui tauva o le vaega e puipuia aiā tatau a tagata le afioga Maualaivao Seiuli Pepe Seiuli, tulaga tolu palota e 727 na maua e le sui tauva o le Samoa ua Potopoto le tofa Maulolo Tavita Uelese Amosa, ma palota e 44 na maua e le sui tauva tuto’atasi o Tupualii Faalili Saena Seuati.