I le tele o lipoti ma tala ua sau, ma māua ai le to’atele o tagatānuu Kiwi ua aga’i ese ma Niu Sila; ua faaalia mai i nisi o lipoti le tuuina mai ai e le malo o Ausetalia o faamaumauga e uiga i le fuainumera o tagatānuu Niu Sila o loo talosaga mo sitiseni Ausetalia.
Ma i faamaumauga ua faamaonia mai ai o le lata i le ‘afa o tagata mai Niu Sila o loo talosaga atu e avea ma sitiseni o le malo o Ausetalia e le’i fananau i Aotearoa.
I le au’ili’iliga o le faamaumauga o loo ta’ua ai, mai le va o le masina o Iulai 2023 ma le masina o Iuni o le tausaga nei 2025, e silia ma le 92,000 sitiseni Niu Sila na talosaga atu e fia avea i latou ma sitiseni o Ausetalia.
I le maualuga ai o lea numera ua alia’e ai ma le fesili poo le mea ea, o Niu Sila o le faitoto’a lea a tagata e malaga mai poo migrants o loo iai le faanaunauga e aga’i atu ma aumau i Ausetalia.
Ta’ua e le Stats NZ, talu mai le amataga o le 2000, o lea na amata maitauina ai lea vaega.
O le numera o sitiseni Niu Sila na malaga ese atu mo Ausetalia i le tausaga e 2024, o le 35 pasene o ia tagata o tagata na fananau i atunuu i fafo.
Ma e pei ona faamaonia mai, o le tausaga talu ai lava ia, e lata i le 30,000 tagata Aotearoa ua aga’i ese ma le atunuu ae malaga atu i Ausetalia, o se numera maualuga lea ua faamauina i le silia ma le 10 tausaga.
Puna o Faamatalaga: https://www.rnz.co.nz/news/political/567964/nearly-half-of-kiwis-applying-for-australian-citizenship-born-elsewhere
