Ua faamauina nei e le matāgaluega o le soifua mālōlōina i lo tatou atunuu le saoasaoa tele o le pepesi o le vairusi o le fiva o ponaivi i lenei masina, pe a fua i faamaumauga lata mai o totonu o le ono aso o Aokuso mai le aso 4 i le aso 10 e 1,974 le aofa’iga o tagata mai falema’i i Savaii ma Upolu e aofia ai le maota gasegase i Motootua, na faamaonia i le mae’a o su’esu’ega le maua i auga o lea faama’i.
I le silia i le lima afe o le tuuaofa’iga o gasegase o le fiva ponaivi sa faamauina talu mai Ianuari, o lea ua siitia maualuga nei le aofa’iga i le 7,970 talu mai le masina amata lava o lenei tausaga.
I le saunoaga faalaua’itele mai le Palemia o le malo tausi i se faatasiga ma tusitala sa auai ma sui o le komiti o faalavelave faafuase’i a le malo, sa faailoa ai e le Palemia o ia foi o le ta’ita’ifono o le komiti le afioga Fiame Naomi Mataafa, ua faamaonia ua ono ola ma soifua ua fano ona o le fiva o ponaivi.
E to’alua gasegase o loo taofia i le taimi nei i potu mo gasegase tigāina.
Se vaega o le saunoaga faalauaitele mai le tama’ita’i Palemia o le malo tausi o le ta’ita’ifono foi o le komiti o faalavelave faafuase’i.
I galuega o loo feagai ma le matāgaluega o le soifua mālōlōina, ua faailoa e le Sui Faatonu Sili le alii foma’i le afioga Tagaloa Dr Robert Thompson ua taunuu nisi o auaunaga faasoifua mālōlōina mai Niu Sila.
Le Sui Faatonu Sili o le matāgaluega o le soifua mālōlōina afioga Tagaloa Dr Robert Thompson.
