Ua faamaonia e le tamaitai Palemia le afioga ia Fiame Naomi Mata’afa, e iai le lipoti mai le Failautusi o le fono aoao faitulafono na tuuina atu i le afioga i le Ao o le Malo i le Aso Lua lea na teena ai e le Palemene le tuuina atu o le tala o le tupe a le malo.
O lea gaioiga na ave ai lea lipoti sa autū i le tofia o le faigamalo tausi ma faailoa ai le numela to’atele o sui faipule e to’aluasefulu o loo i le vaega faaupufai o le Faatuatua i le Atua Samoa ua Tasi.
Ua aumai faalaua’itele le faasilasilaga a le afioga i le Ao o le Malo ua faailoa ai lona talia o le fautuaga a le ta’ita’i o le malo e faata’ape le Palemene, ma faailoa ai foi e le Ao o le Malo lona tofia o le Palemia ma lana Kapeneta e tauaveina tiute o le malo tausi e faatali ai le mae’a o le isi palota tele faapea le tauaofiaga muamua o le paeaiga fou a le Palemene.
