O le fono faaletausaga lona 58 a le Faletupe o Atina’e o Asia, le Asian Development Bank sa usuia i le aai o Milan i le atunuu o Italia sa folasia ai le lagolago a Samoa i faiga faavae ma polokalame o le siitia o atina’e o atunuu e ala mai i le lagolago a lea faletupe tele i le lalolagi.

O le siitia o le atina’e i le itu i le soifua mālōlōina, tamaoaiga, ma auala o fela’ua’iga faapea polokalame e fesoota’i ma suiga o le tau o nisi ia o vaega tāua sa tautalagia i lea fono faaletausaga sa auai le usugafono a Samoa na ta’ita’ia e le Minisita o Tupe le afioga Lautimuia Afoa Uelese Vaai.

Sa aofia ai i le usugafono ma nisi o ofisa sinia o le Matāgaluega o Tupe a le Malo ma le Faletupe Tutotonu o Samoa.

Sa auai foi lea usugafono i le fono faaletausaga a Minisita o Tupe a le Malo o Iapani o se tasi o atunuu o loo faipaaga ma Samoa i le tele o fesoota’iga tau i le siitia o tulaga o tamaoaiga aemaise o se atunuu e fesoasoani tele i atina’e o Samoa.