E iai vaega o le tatou atunuu sa molimauina ai le o’oo’o o le sua o le tai e māfua i fautuaga o le galulolo sa lapata’ia ai nisi o atunuu o le lalolagi ma le Pasefika, e māfua i le mafui’e malosi sa lūlūina ai se motu o le atunuu o Rusia i le aoauli o le Aso Lulu o le vaiaso nei.
I le feiloa’iga a tusitala ma sui o le komiti o faalavelave faafuase’i sa galulue i le tuuina atu o fautuaga i lo tatou atunuu, na faailoa ai e le Sui Ofisa Sili o le vaaitau le susuga Afaese Dr Luteru Tauvale, e ui ina sa o’oo’o le sua o le tai i uta ma lofia ai nisi o alatetele, ae e leai se lipoti o ni meatotino sa faaleagaina.
E leai foi se soifua na aafia. O le galuega sa logoina ai tagata o nonofo tulata i le sami e aga’i i nofoaga maualuluga mo lo latou saogalemu, na faaalia e le komiti e iai lava i latou sa lagolago atu ae sa iai foi ma le ‘au faafiufiu.
