Ua faamaonia mai e ala i se faasalalauga i luga o le itulau a le vaega faaupufai a le National le pasia ai o le maliega tau fefaataua’iga a Niu Sila ma le malo o le UAE ua avea nei ma tulafono.
Ma e ta’ua o se tulaga maoa’e ma mata’ina lea mo tagatānuu Kiwī.
Faamatala o lea tulafono o le a mafai ai e tagata Kiwi o loo faatinoina tulaga o fefaataua’iga, ona maua lo latou avanoa e faatau atu ai i atunuu i fafo a latou oloa aemaise o meaai taumafa i maketi tetele faavaomalo e oo atu i le $500 piliona lona tau aofa’i.
E pei ona faailoa o le 90% o mea’ai taumafa e faatau atu ma faatau mai i nei maketi tetele.
Faamanino e le National afai ae amata ona faatino lea vaega, o lona uiga o le a vaaia le tuuitiitia o lafoga e totogi i luga o oloa poo tariffs, o le a faaopoopo avanoa mo tagata fefaataua’i a Niu Sila, o exporters ma o le a vaaia le to’atele o tagata Kiwī e nafataulimaina lea vaega tāua o le tamaoaiga o le atunuu e auai atu i totonu o atunuu o loo i Sasa’e Tutotonu poo le Middle East.
Faaalia o le fiafiaga tele i le faamaonia mai ai o lea faamoemoe, o le a saga faamausalī ai tulaga o le tamaoaiga o Aotearoa nei, ae o le a vaaia foi le faaopoopo ai o galuega, o le siitia o totogi ma le alualu ai pea i luma o taumafaiga a le atunuu.
Puna o Faamatalaga: https://www.facebook.com/share/p/1Em4wL6Cpi/
