Ua momoli atu e le Komiti Faafoe o le faalapotopotoga o tusitala ma tagata faasalalau a Samoa i le Malo se tuualalo malosi, ua finauina ai le aveesea ma soloia mai le tulafono o soligatulafono le Crimes Act le aiaiga o loo avanoa ai ona avea o se solitulafono poo se criminal offence le faia o ni tala ma nisi lava gaioiga e faaleaga ai se tagata.
A lava mau a leoleo ia latou su’esu’ega i se tagi e faaulu atu, ona faia lea o se moliaga poo ni moliaga i se tasi poo nisi ua tuua’ia.
O le tuualalo a le Komiti Faafoe o le faalapotopotoga o tusitala ma le aufaasalalau a Samoa o loo aofia i se pepa o faamatalaga mai le komiti ua faailoa ai le lagolagoina o le sa’olotoga e faatino ai galuega a sui o le faalapotopotoga, e mafua mai i le molia e leoleo o le tusitala sinia o le vaega faasalalau o le Talamua o loo tauaveina le tofi Pelesetene o le JAWS le tamaitai o Lagi Keresoma.
O le faaaogāina pea o lea aiaiga faaletulafono ua talitonu le faalapotopotoga o le a avea pea ma se tasi o auala e lamatia ai le faatinoga o galuega a tusitala i se tulaga tuto’atasi e aunoa ma le aiāina pe faalavelaveina i ni taumafaiga e natia ai le faailoa o le mea moni.
Mo le silafia sa aveesea ma soloia muamua lea vaega o le tulafono o soligatulafono i le tausaga e 2013 peita’i o le tausaga e 2017 na toe avane ai i le Palemene ma pasia ai lea ua aiaia ai nei o le criminal defamation ae ua lē o le criminal libel e pei ona sa iai muamua.
O le mau a le malo i lea taimi ua alagātatau le toe faatula’i mai o lea aiaiga tau soligatulafono ona ua malosi gaioiga taufaaleaga i luga o fesoota’iga faaonaponei le social media e pei ona fulisia o tatou tagata e faaaogā le api o foliga poo le facebook.
O le moliaga o le tamaitai tusitala e mafua mai i se tala sa ia tusia ma faasalalau i le amataga o le masina nei o Me, lea o loo faailoa ai se gaioiga a se tasi sa avea ma leoleo na oo ai i le Ao o le Malo e sa’ili se lavea’i e ave ai i tua se moliaga a leoleo o loo molia ai.
Ua faailoa e Lagi o le a ia teena le moliaga a leoleo pe a tula’i i le aso 24 o Iuni.
