Ua faailoa e le Peresetene o Korea i Saute o le a ia malie ane i se maliega i le va o Donald Trump ma Kim Jong Un e faatatau i le taofia o le gaosia o ‘au’upega tau niukilia ae lē o le aveesea o ia ‘au’upega.
Fai mai le BBC o le saunoaga lea a Lee Jae Myung sa fai atu i le latou faatalanoaga ma ia ta’ua ai o loo gaosia pea e Korea i Mātū le isi 15-20 meatau niukilia i le tausaga ma afai ae taofia lea tulaga, o se tulaga lelei tele lea i le faaitiitia o meatau niukilia i le lalolagi.
O le 2022 na folafola ai e Korea i Mātū o latou o se atunuu o loo iai malosi’aga faaniukilia ma o le a lē mafai ona aveesea.
E manatu la le ta’ita’i o Korea i Saute o lana fesili pe sili atu ona faaauau pea le finau ia aveesea meatau niukilia ae lē o fua mai lea finau, pe sili atu le faatulaga o se fuafuaga faapea e taofia ai le gaosia o auupega niukilia ae o loo mafai ona faaitiitia ai le faafitauli.
Fai mai le Peresetene o Korea i Saute o le vaaia o ta’ita’i o Saina, Lusia ma Korea i Mātū o iai faatasi i Saina i le faaaliga na faia ai ua ia manatu ai e sili ai ona aga’i e galulue faatasi ma Amerika ma Iapani.
Puna o Faamatalaga: https://www.bbc.com/news/articles/cwy91w0e1z2o
