Ua faamatala e se tagata faigaluega mai Korea i Saute i le BBC le taimi na ia molimauina ai se gaioiga tele o le immigration operation sa faia i se nofoaga e fausia ai taavale i Georgia ma ia faamatala ai le tele o le nunumi ma le lē malamalama o le to’atele a o aga’i atu le au su’esu’e a Amerika ma tapu’e le to’atele.
O lē na faatalanoa e le BBC e musu e faailoa lona tagata ae sa iai i le nofoaga lea na faatino ai lea gaioiga, o le nofoaga e umia faatasi e le Hyundai ma le LG Energy lea na aga’i atu iai sui o le Immigration ma le Custom ma pu’e mai ai tagata e 475 e aofia ai ma tagata Korea i Saute, fai mai o nisi sa loka lima i filifili.
Fai mai le molimau a le tagata faigaluega sa ia faalogo i le tatagi o le mau telefoni i le nofoaga faigaluega atoa ma le fe’au o loo faailoa mai ina ia tapunia uma galuega ma ia iloa ai o le osofa’iga ua alu ane a le immigration ma le custom.
Fua i faamatalaga mai sui o Amerika i le lipoti lava lea a le BBC, ua faailoa ai o nisi tagata faigaluega na taumafai e sosola i le taimi lea o le osofa’iga.
O le faamatalaga a le molimau i le ofisa faasalalau e faapea o ituaiga tulaga faapea ua aafia ai le sootaga poo le mafutaga foi a le faigāmalo a Amerika ma tagata Korea o loo inivesi a latou tupe i pisinisi i totonu o Amerika.
O osofa’iga ia a le Immigration ma le ofisa o le tiute o loo faia faasolo i le atunuu mo le sa’ilia o tagata e lē o iai ni visa talafeagai e aumau ai i le malo tele.
Puna o Faamatalaga: https://www.bbc.com/news/articles/c5yqg0rln74o
