Ua faailoa mai foi e le atunuu o Kanata ua iai foi le latou fuafuaga o le a amana’ia loa foi e lo latou atunuu le setete o Palesitina pe a oo atu i le masina o Setema, o le faamatalaga lea a le Palemia o le atunuu, o Mark Carney na faia i le ‘autusitala.
Fai mai le Palemia e pei ona lipotia e le CNN, o Kanata lava ia ua leva ona lagolagoina le faia o le two state solution, o se Palesitina e soifua tuto’atasi i autafa ane o le setete o Isaraelu i le filemu ma le malupuipuia.
E tai faapea folasaga mai isi atunuu e pei o Farani lea foi ua faailoa lo latou faia o se gaioiga faapea i le masina foi o Setema atoa ai foi ma le UK e pei ona folasia i le aso ananafi.
Ta’ua e Carney i le CNN ua fuafua e faatino lea tulaga i le fonotaga lona 80 a le General Assembly a le UN.
Na ia ta’ua foi ua mae’a talanoa ma le Peresetene o le Palestinian Authority o Mahmoud Abbas ma ua mae’a faailoa ane o le a faatino lelei e lana pulega le faia o faigāpalota ua leva ona talia a le atunuu i le 2026 lea o le a leai ai se matāfaioi a le Hamas e faia ai.
Puna o Faamatalaga: https://edition.cnn.com/2025/07/30/world/canada-recognize-palestinian-state-september-intl-latam
