O le tausaga e 2016 i le filifilia ai o le Pelesetene ma sui o le laulau o le Komiti Faafoe o le faalapotopotoga o le aufaigaluega a le malo le PSA (Public Service Association) e ulufale atu e na o le 257 tālā ma sene o loo i le tusitupe a le faalapotopotoga.
O le molimau lea a se tasi o sui o le Komiti Faafoe i le tatalaina o le galuega o le maota fou o le PSA ua fausia i le nofoaga i Fugalei sa iai le maota fogafalelua tuai o le faalapotopotoga na faatama’ia i se mu i le masina o Aperila o le tausaga 2023.
I le galuega a le Komiti Faafoe ma sui lesitala o le PSA na mafai ona faatupe ai le maota fou i le tau e toetoe oo i le 600 afe tālā.
O le faalapotopotoga o tagata faigaluega a le malo o se tasi o asosi malosi e fua i mea na tutupu i le tausaga e 1981 na alu ai le solo tetee tele a tagata faigaluega faasaga i le malo.
O le tausaga e 2021 ina ua suia le pulega malo a Samoa na tau aliali mai ai se isi gaioiga faapea a le PSA peitai e ui sa faamata’u ai le tau amatamataga o le pulegamalo a le vaega faaupufai o le Faatuatua i le Atua Samoa ua Tasi, ae e le’i taunuu.
O le tamaitai Palemia o le malo tausi le afioga Fiame Naomi Mataafa na saunoa i le tatalaina o le maota fou o le faalapotopotoga.
O le Pelesetene o le faalapotopotoga sa saunoa foi i le umusaina o le maota tutofonu fou o le P.S.A le afioga Lealaisalanoa Karameli Tuala.
O le faalapotopotoga o tagata faigaluega a le malo o Samoa na ulua’i faavaeina i le tausaga e 1969 e pei ona faailoa i faamaumauga i luga o upega tafa’ilagi.
O vaega o saunoaga mai le umusaina o le maota fou o le PSA na faia i le Aso Faraile ua mavae, sa pu’eina e le auaunaga o faamatalaga i le ofisa sooupu a le malo, i le matāgaluega a le Palemia ma le Kapeneta.
