Ua faamaonia mai e Isaraelu ua o latou toe tipoti atu i lona atunuu le tamaitai Suetena o Greta Thunberg lea na malaga ane i le vaa sa fuafua e ave ane ai fesoasoani mo Gaza ae taofia e vaegā’au a Isaraelu i le Atu Metitirani i le vaiaso talu ai.
Fai mai le BBC na aga’i ese mai Greta i se faigamalaga mai Tel Aviv i le aso ananafi ma aga’i atu ai i Farani ma ua ioe ane e toe tipoti ia i lona atunuu.
Ina ua taunuu i Paris sa ia tuua’ia ai Isaraelu i le ave faasolitulafono ma faamalosia o ia ma isi o lana aumalaga a o iai i ogasami faavaomalo.
O le faamatalaga mai Farani ua ta’ua ai o le to’a 5 o tagata Farani e to’a 6 na taofia faatasi ma Greta, latou te lē o sainia le poloa’iga e toe tipoti ai i latou i o latou atunuu o lona uiga o le a tatau ona tutula’i i le faamasinoga e tusa o tulafono a Isaraelu.
Fesiligia Greta e le autusitala pe aisea ua faasa’oloto ai na o ia ae taofia pea isi ae na ia ta’ua e lē o manino i lea tulaga ae na te iloa o nisi o le latou aumalaga lea e le’i ioe e sainia pepa e toe faafoi ai i o latou atunuu.
Fai mai le lipoti o i latou uma sa i luga o le vaa e pei ona ta’ua o tagata sitiseni o Brazil, Siamani, Netherlands, Spain ma Take.
Puna o Faamatalaga: https://www.bbc.com/news/articles/c5y264x3nnno
