Ua vevesi Isaraelu ona o le faamālōlō e le Palemia o le Minisita o le Puipuiga a le atunuu i le vaiaso nei.
Ua vaaia le ‘autetee i lea faai’uga i luga o magaala ma ua valaau ai ia tatau ona faamavae Netanyahu.
O loo lipotia e le BBC ua leva ona iai fevaevaea’iga ia i le va o le Palemia ma le minisita lea o Yoav Gallant ma sa lipotia foi i se taimi ua sola le lē fiafia o le minisita i le mataupu e faatatau i le lē faatagaina o nisi sitiseni o Isaraelu mai le auauna ai i vaega’au a le atunuu.
O le tausaga talu ai a o le’i tupu le vevesi ma le Hamas sa faamālōlō ai e Netanyahu le minisita lea ona o eseesega lava faapolokiki ae na toe faafaigaluegaina ina ua alia’e ni finagalo faaalia mai tagata lautele peitai la i le vaiaso nei ua saunoa ai Netanyahu ua leai se faatuatuaga i lo la va ma ua tatau ai ona faia lea faai’uga.
O nisi o loo tetee i le faai’uga a le Palemia ua o latou faailoa o loo tuuina e Netanyahu le atunuu i se tulaga lamatia ma valaau ai ua alaga tatau ona faamālōlō le Palemia ma tuu le avanoa i tagata o loo latou manatu mamafa ia Isaraelu, e ta’ita’ia le atunuu.
O aiga foi o tagata Isaraelu o loo ave faapagota e le Hamas ua o latou lagolago i le minisita ae tetee i le faai’uga a le Palemia.
Puna o Faamatalaga: https://www.bbc.com/news/articles/cqj07jdzzgno
